Kain Nayie - Kain Nayar (Shawl)
ကိန္နရာများဟာ နူးညံ့တဲ့အမူအရာရှိခြင်း၊ ပန်းဝတ်ဆံကို စားသုံးခြင်း၊ အဆင်းအင်္ဂါနဲ့ ပြည့်စုံခြင်း၊ ဘုရားပွင့်တော်မူတဲ့နေ့မှာ ဝမ်းမြောက်ဝမ်းသာ မြူးထူးခြင်း စသည့် မင်္ဂလာများရှိတယ်လို့ အစဉ်အလာအရ မြန်မာလူမျိုးတို့က ယုံကြည်ကြပါတယ်။ ဒါကြောင့်ပဲ မြန်မာဘုရင်မင်းများက ရာဇပလ္လင်မှာ ကိန္နရာကနေတဲ့ဟန် ထုလုပ်လေ့ရှိကြပါတယ်။ မြန်မာတိုင်းရင်းသားလူမျိုးတစ်မျိုးဖြစ်တဲ့ ကယားလူမျိုးများကတော့ သူတို့ဟာ ကိန္နရာ၊ ကိန္နရီများက ဆင်းသက်လာတယ်လို့ ယုံကြည်ကြပါတယ်။ မြန်မာနိုင်ငံကယားပြည် ငွေတောင်ပေါ်မှာ ကိန္နရာ၊ ကိန္နရီတွေ နေထိုင်ခဲ့ကြတယ်လို့ လူသိများပါတယ်။ ဒီလို ကောင်းခြင်းတွေနဲ့ ပြည့်စုံတဲ့ ကိန္နရာ၊ ကိန္နရီမောင်နှံကို မြန်မာ့ရိုးရာကနုတ်ပန်းနဲ့ တွဲစပ်ဖန်တီးထားတဲ့ ဒီဇိုင်းကတော့ မြန်မာ့ယဉ်ကျေးမှုကိုရော၊ ကိန္နရီမောင်နှံကိုပါ ချစ်မြတ်နိုးပြီး နိမိတ်ကောင်းကို ယုံကြည်တဲ့ ပရိသတ်တွေအကြိုက်တွေ့မှာ သေချာပါတယ်။
